Racconti e Fiabe

Lu Vèspiru sicilianu.

I vespri siciliani, III versione, di Francesco Hayez, olio su tela, 1846, Galleria d’arte moderna e contemporanea, Roma.

Si cunta e s’arriccunta ca a tempi ca cci fôru ‘n Sicilia li Francisi; sti Francisi si misiru a fari tanti angarii ca nuddu nni putía cchiù. ‘Nta di l’àutri misiru la liggi, ca di li donni siciliani cu’ si maritava s’avia a curcari la prima sira cu un Francisi e poi ddoppu cu lu maritu; figuràmunni ca si era una ricca, si cci curcava un capitanu francisi; si era di la mastranza si cci curcava un sargenti o puru un capurali; si era una povira si cci curcava un surdatu. Ora sti cosi eranu di addiggirìrisi? Mancu pri sonnu! e tantu cchiù ca sti Francisi eranu patruna di tutti li cosi nostri, trasianu e niscianu di li casi di li Siciliani comu si fussiru casi so’, si pigghiavanu l’oru e l’argentu e zoccu cci piacia; e chistu sparti di lu ‘ncuitamentu di li mugghieri di chistu e di chiddu.
Cc’era e cc’era un omu di gran curaggiu e valurusu, ca a sti Francisi tiranni cci l’avía a morti. St’omu si chiamava Giuanni Pròcita, e l’avìanu distirratu fora Regnu. Iddu chi fa! comu senti tutti li ‘nfamità di li Francisi chi facìanu ‘n Sicilia, si vesti cu ‘na tònaca di monacu, si crisci la varva e veni ccà ‘n Sicilia. Ddocu si finci pazzu, e jìa firriannu tutti li paisi di lu Regnu, e cu ‘na trumma di càccami jìa parrannu a l’aricchi di tutti chiddi chi ‘ncuntrava; a cu’ era sicilianu cci dicía: – «Vidi ca a lu Vèspiru di marzu avemu a ‘mmazzari a tutti li Francisi;» a cu’ era Francisi cci dicía muttetti e canzuneddi di ridiri; e iddi nenti sapennu ca vulía la sò morti, cci ridianu e cci dicìanu: – «Poviru pazzu!»
Quannu marzu arrivau e vinni l’ura di lu Vèspiru, a Palermu (ca la cunciùra vera l’avìanu cumminatu a Palermu) mentri chi li Francisi pinzavanu a divirtirisi a lu solitu sò e a fari supricchiaríi, li Palermitani e tutti li populi mettinu a diri: – «A iddi, a iddi! morti a li Francisi! e li scannàru a tutti ‘nta quantu lu dicu e lu cuntu. Poi nèscinu pri tutti li paisi e li campagni, e javanu dumannannu a tutti chiddi chi scuntravanu: – «A tia! dici cìciri.» – «Cìciri.» – «Vattinni ca si’ di li nostri. – Tu, dici cìciri.» – «Chìchiri.» – «Ah, sciliratu! tu ‘nfami Francisi si’! e l’ammazzavanu senza pietà: e pirchì li Francisi nun putìanu diri cìciri e dicianu chìchiri, li canuscìanu allura; e accussì nni livàru di ‘mmenzu tutta la mala simenza. Ddoppu chistu, pigghiaru tutti li ciuretti di li Francisi ch’avìanu ammazzatu, li salaru ‘nta li varrili di tunnina e cci nni mannaru ‘na varcata ‘n Francia; e si miritavanu chissu e àutru, pirchì li tirannìi chi iddi ficiru fôru nenti a pettu di chissi. A Giuanni Procita lu ficiru Cumannanti ‘n càpita, e accussì li Francisi nun s’azzardaru cchiui a mettiri pedi ‘nta la nostra Terra; e si nni scantàru tantu, e ora puru si nni scàntanu, ca ogni annupigghianu ‘na carta cu la Sicilia (veni a diri la Sicilia stampata ‘nta ‘na carta) e all’ura di Vèspiru ‘nta Marzu l’abbrucianu ‘mmenzu la chiazza; e cu chistu vonnu significari ca si vinissiru arreri ccà e putissiru aviri ‘mmanu la Sicilia, l’abbrucirìanu accussì: ma nun hannu chi fari, pirchì li Siciliani a li Francisi cci l’hannu sempri pri la ‘nfamità chi ficiru, e a costu di mòriri tutti, un Francisi nun cci havi a mettiri pedi cchiù ccà nni nui. – E chistu è lu Vèspiru Sicilianu contra la tirannia di li Francisi.

G. Pitrè, Fiabe novelle e racconti popolari siciliani – Vol. IV

 

Marianna

Vive a Palermo. Appassionata di fotografia, di lettura e di ogni forma d'arte (o quasi). Innamorata della Sicilia. Laureata in Lettere Moderne con una tesi sul cibo all'interno della letteratura e dei menu siciliani.

Lascia un commento

Il tuo indirizzo email non sarà pubblicato. I campi obbligatori sono contrassegnati *