Racconti e Fiabe

Gugghiermu lu Bonu.

Re Guglielmo il Buono dona il Duomo di Monreale alla Vergine Maria. Statua posta davanti l’ingresso laterale del Duomo di Monreale.

‘Na vota cc’era e cc’era un Rignanti ca avía lu duminiu supra di la Sicilia; ssu Rignanti si chiamava Gugghiermu lu Bonu, pirchì era Bonu cu tutti, avía lu cori comu la carta, e a nuddu mai appi a fari lamintari, mancu pri ‘na zicchittata; basta a diri ca fu chiddu ca livau la munita di còriu chi misi lu Gugghiermu lu Malu, pirchì iddu a li populi li vulía beni assai. Dunca, comu stu Gugghiermu lu Bonu era accussì virtuusu, e divotu ca era di la Madonna, la Madonna ‘na jurnata cci vosi fari un ‘mbrâculu ca nun l’avía fattu mai a nuddu; e chi fa? mentri iddu era a caccia a Murriali cci fa vèniri un gran sonnu e lu fici addurmìsciri sutta un pedi di carrubba. Mentri dormi, si ‘nsunnau a la Madonna e cci dicía: – «Vidi ca ddocu sutta unni dormi tu cc’è un granniusu tisoru, ma granni ca l’aguali nun si cunta, ed è sarvatu apposta pri tia: sa’ ch’ha’ fari? fràbbicami ddocu stissu lu tempiu meu, ca cci nn’è bisognu ca la Cristianitati è scarsa.» E comu dissi accussì la Madonna spiriu. Lu Gugghiermu lu Bonu a stu fattu s’arrispìgghia, ed avía ancora l’occhi abbagghiati di li ‘stremi biddizzi e di lu sblennuri chi avía la Bedda Matri: chiama subbitu mastri muratura e mastri pirriatura, fa scippari lu pedi di carrubba, scava cchiù ‘n funnu e trova un massenti di munita d’oru tantu, ca iddu stissu arristau cu la vucca aperta. – «Prestu (dici), chi si facissi lu tronu di la Gran Signura Matri di Diu, ca idda lu voli!» Parola di Re, e subbitu s’appi a’siguiri. Chiama maistri di l’oru e capimastri di tuttu l’universu munnu, e hannu misu a fari lu tempiu di la Madonna, giustu ddà a Murriali; chiddu stissu d’oru e di petri priziusi ca cc’è ancora, ed è ‘na musía, ed è dignu veru di la Madonna. Gugghiermu lu Bonu nni fu cuntintuni ca nun si pò diri: ringraziau a la Madonna, e ddoppu muríu ‘n santa paci comu tutti li veri Cristiani. – E chistu è lu cuntu di lu Re Gugghiermu lu Bonu.

G. Pitrè, Fiabe novelle e racconti popolari siciliani – Vol. IV

Marianna

Vive a Palermo. Appassionata di fotografia, di lettura e di ogni forma d'arte (o quasi). Innamorata della Sicilia. Laureata in Lettere Moderne con una tesi sul cibo all'interno della letteratura e dei menu siciliani.

Lascia un commento

Il tuo indirizzo email non sarà pubblicato. I campi obbligatori sono contrassegnati *