Racconti e Fiabe

Li Biati Pauli

Si cunta ca a tempi arreri cc’era ‘na Suciità di maistri e di populu abbàsciu ca difinnìanu li gritti di li boni aggenti, e li vinnicavanu contra li priputenti ricchi e li nobili ca avìanu lu putiri ‘mmanu e facìanu angarii e cosi torti a la pupulazioni. Mittemu ca cc’era un riccu ca ‘ncuitava ‘na picciotta onesta di lu populu abbàsciu; lu sapìanu li Biati Pauli, e zittu tu e zittu io cci facìanu assèntiri ca o si cuitava iddu, o chi lu livavanu di ‘mmenzu; e si nun la sintía la canzuna, si l’astutavanu pi daveru, e nuddu ciatava. Si cc’era, figuràmunni, un Viciarrè, ca facía priputenzi, e cunnannava attortamenti, e mannava ‘n galera senza ragiuni, li Biati Pauli ca lu sapìanu (picchì iddi ca avìanu li culleghi e l’amicizii pi tuttu lu Regnu sapìanu tutti li suspiri di li populi) cci facìanu giustizia contra lu Viciarrè, ca si lu spidugghiavanu bellu bellu cu du’ corpa di cuteddu. ‘Nsumma addifinnianu li nostri gritti, e li cosi caminavanu cu lu versu, no comu caminanu ora, ca li Biati Pauli cci vurrèvanu pi daveru.
Sti Biati Pauli cci nn’eranu pi tutti li paisi di lu Regnu; ma li cchiù assa’ eranu ‘n Palermu, e tinìanu cuncùmiu ‘nta ‘na grutta sutta terra chi cc’era allatu San Cosimu; e criju ca cci sia puranchi ora, pirchì la strata la chiamanu Strata di li Biati Pauli. A st’omini cci davanu stu titulu pirchì eranu tutti omini ca facìanu li divoti; lu jornu, pri putiri sapiri megghiu li cosi chi succidìanu, javanu vistuti comu monaci di San Franciscu di Paula e si stavanu ‘nta li Chiesi a diri lu rusariu (pri finzioni): la notti poi facìanu cunciùra di zoccu avìanu vistu e avìanu saputu, e urdinavanu li minnitti. Ddoppu tempu la Giustizia li juncíu e l’affurcau a tutti, e li Biati Pauli fineru pi ‘na vota e pi sempri.

G. Pitrè, Fiabe novelle e racconti popolari siciliani – Vol. IV

Marianna

Vive a Palermo. Appassionata di fotografia, di lettura e di ogni forma d'arte (o quasi). Innamorata della Sicilia. Laureata in Lettere Moderne con una tesi sul cibo all'interno della letteratura e dei menu siciliani.

Lascia un commento

Il tuo indirizzo email non sarà pubblicato. I campi obbligatori sono contrassegnati *